Wie ich scho im letschte Blogiitrag erwähnt ha, hemer müesse zügle. Da euse Schuelbus ned bes det hii fahrt, het mini Gastmuetter mich und d Victoria müesse id Schuel brenge. Das het Spass gmacht, well mer hend vell chönne rede. Hät eigentlich mis Blog-Hintergrundbeld selle ändere, aber ja, hani chli vergesse. Do esch es Bild vo eusem neue Huus.
Es esch ganz okay. Aber es esch vell chliner und mer hend fasch kei Platz för alles. Aber ja, sie werde meh Platz ha wenn mer Uustüschschüeler gange send. Ich und Victoria hend es Badzimmer zwösche eusne Rüüm, das esch voll cool. Werde das zemlech vermesse.
Am 23. April han ich Prom gha. Ich ben met mim Frönd gange. Es esch ned würklech speziell gsii. Mer send goh ässe vor em Prom, und wo mer dete gsii send semer nur umeghockt und hend ned wörklech tanzt. Ich verstoh ned wieso alli Amerikaner denke, Prom esch so speziell. Sie gäbe mega vell Geld uus för es Chleid, Makeup, mängisch sogar för en Limousine. Ich han mega lang brucht es Chleid z fende, aber denn han ich en mega guete Deal för eis becho, und ben emmer no mega zfrede met minere Wahl.
Am 3. Juni esch de letscht Schueltag gsii, und am Tag vorher minere Schwöschter, Victoria, ehri Graduation. Ich han dörfe dete methelfe als Junior Marshall. Das send die beschte 25 oder so Schüeler vo de 11. Klass. Ich ben eini vo de 3 beschte gsii, also han ich dörfe chli meh methelfe, aber es esch ned so speziell gsii. Han nur de Seniors zeigt wenn sie müend uufstoh und absitze. In Amerika Graduation esch au öpis mega speziells, was ich au ned ganz verstoh. För mich bedütets eifach, dass du die obligatorisch Schuelziit abschlosse hesch, also alles was vo eim erwartet werd. Ich fende ned, dass das sone grossi Leistig esch. Natürlich eschs för d Victoria au ned wörklech speziell gsii, sie muess in Estland nomol es Johr id Schuel. Aber esch halt glich cool mol sone amerikanischi Graduation metzerlebe.
Ah jo, han mini Hoor nomol gfärbt. Hani zom Geburtstag gschänkt becho. Mer het s pink besser gfalle, aber die meischte sege sie fende das maroon/violett woni jetzt ha besser.
D Victoria het mich scho letschte Mittwoch verloh. Es esch ned so schlemm gsi wie ich dänkt ha. Meh realisierts gar ned, ned mol inere Woche. Ich dänke wenn ich no länger wörd ellei do blibe, würd ichs eher merke wie ich sie vermesse. Aber das chunnt de scho no. Mini Gastmuetter het leider ned chönne debii sii. Vellecht esch das aber au besser gsii, well ich han s Gfühl sie hät am meischte grännet. Falls ehr euch no as erschte Bild vo mer und de Victoria chönnd erennere (i mim 3. Blogpost), semer uf zwoi wiise Stüehl gsässe. Zum Abschluss hemer nomol es Bild uf dene zwoi Stüehl gmacht.
Schösch hani glaubs ned vell meh z verzelle. Werde wahrschiinlech no en wiitere Blogiitrag mache i öppe 2 Woche oder so, nur zum verzelle wies mer ergange esch, woni weder id Schwiiz cho be. Ich freue mich druf alli weder zgseh und all die feine Sache weder z ässe, hahah. Werd aber glich schwerig alles do zrogzloh.
Bis bald!
Keine Kommentare:
Kommentar veröffentlichen