Kurz nachdem ich de letscht Iitrag veröffentlicht han, ben ich nach New Hampshire gange. D Fahrt het so lang duuret, öpe 16 Stund. Mer send det för nes paar Täg blibe wells mim Gastvater sinere Muetter ned so guet goht. Das heisst, mer send sie jede Tag goh bsueche. Aber mer send au no anderi Sache goh mache. Einisch semer nach Portsmouth gange, das esch mega schön gsii. In New Hampshire hend sie Schnee gha, was sie do in South Carolina scho set 2 Johr scho nöme gha hend. Mer send det öber Silvester blebe. Mer hend ned so vell gmacht, nur fein Znacht gässe met de Familie und denn es paar Speli gspelt. D Eltere hend sogar welle goh schlofe bevor s neue Johr aagfange het, aber well mer hend welle wach blibe, hend sie met eus gwartet und gfiiret.
![](https://blogger.googleusercontent.com/img/b/R29vZ2xl/AVvXsEia8SMm-gEco-GNDWLwE4IAKfBR-tuPCGMpBq5oaQNyHZaZjLOtG_MlciG_KGFprsBXXGuCmjjeCNnxJAhBFyZKi-qC-nFQKqRlKxVZySfhfk2SDafetGav1KhEd1AYKuiit-3-0Hv9MUI/s320/February+14%252C+2016.jpg)
![](https://blogger.googleusercontent.com/img/b/R29vZ2xl/AVvXsEjbVNvregk0o8QgchcnWMHt-Oxc-hnUtJt8qPBZ6ImNHbow3bY8zksm7Q4hFQ0bQDUwQR2ietTAN0PYXeRKK1aqAWmQhl0n8SPq7k3TQuMFyc_oUgIvjgmXCBT7H0QiIgKcPlnY5hf3-JA/s320/att_145692156981565.jpeg)
Am 12. März ben ich nach California gange met 50 andere Uustuschschüler wo grad i de USA send. Zersch semer in Los Angeles gsii för 3 Täg und denn semer nach San Francisco gange. Am erschte Tag semer gohs Hollywood Sign aaluege, jedoch ned vo nöchem, es wär z lang gange döt hii z laufe. Nachher semer id Universal Studios gange. Uf das han ich mich am meischte gfreut, well mer hend chönne d Studios aluege wo sie Filme und Shows dreihe. Jedoch hemer ned chönne inegoh. Aber mer hend Filmsets gseh, ganzi Hüüser und Seene und so.
Am zwoite Tag semer is Madame Tussaud Wachsmuseum gange und hend de Walk of Fame gseh, denn semer nach Beverly Hills gange, wo mer ned vell hend chönne mache, well det nur tüüri Läde send. Nachher semer zom Santa Monica Pier gange, womer hend chönne am Strand relaxe und es paar Läde aaluege.
Am nöchschte Tag semer is Disneyland gange. Eigentlech semer i zwoi Parks gsii, well es esch uufteilt in California Adventure Park und Disneyland. Bim letschtere gohts halt meh um Disney als bim andere wos meh Achterbahne het. Es esch mega cool gsi, aber mini Füess hend mega weh do nach so vell laufe. Zum Glück semer am nöchschte Tag nur im Bus unterwegs gsii, well mer vo L.A. nach San Francisco gfahre send. Das het 7 Stunde duuret.
Am 5. Tag semer San Francisco goh aluege und hend en Stadtfüehrig gha. Das esch mega interessant gsii. Mer send au no de Pier 39 goh bsueche, das esch en berüehmte Pier well Seelöwe send det hii cho und lebe jetzt det. Und jetzt gehts halt det mega vell Läde und so.
Am letschte Tag semer öber d Golden Gate Bridge gloffe und zum berüehmte Gfängnis Alcatraz gange wo ufere Insle esch. Denn hemer weder zrug is Hotel müesse um eus uf d Abschlussparty vorzbereite. Ich han mega vell Spass gha uf dere Reis und vell neui, netti Lüüt vo de ganze Welt kenneglehrt. Natürlich han ich au mega vell Bilder gmacht, also wenn ergendöper wott all die aaluege, schribet mer eifach es Email oder so.
Nechscht Woche werd zemlech vell passiere. Vom Fritig bes am Sunntig werde mer umzieh well sechs mini Gasteltere im Moment ned chönnt leiste, i dem Huus blibe zwohne. Mer werde nach Elgin zieh, das esh öpe 20 Minute vo Blythewood entfernt. Am Samschtig wird au no min Prom stattfindet. Das esch so wie en Ball för Juniors und Seniors. Ich weiss jetzt au mis genaue Ankunftsdatum wenn ich weder zrug i de Schwiiz be.
23. Juni 2016, 8:30 Uhr, am Flughafen Zürich
Ich werde nomol en Blogiitrag mache bevor ich zrug chome. Goht jo nöme so lang, leider.
Bis bald!
Hallo Gotteli,danke för wider einische meeeh interessanti poscht ! weimer no einisch skype, de chöntme aues besser usdröcke, weisch hoooorfarb oder em näbegrüsch.... ond so !? was meinsch chaschmer schriiibe wenn !äs feschts dröcki ond kössli vom Gotti bay bay
AntwortenLöschen